Тани али пукси вал Петерен сётэм "Куинетӥ выж" нимо текстэз берыктон борды. Секыт ӧвӧл, пе. Оо, пе. Стилез дышымтэ, веранъёсыз икыр-кукыр позыръяса кадь гожъямын. Куинь пол лыдӟыны кутскылӥ, дыр, ини, сётэм люкетэз, одӥг предложенизэ "ворми ик", табере нош, тӥни - берыктон борды басьтӥськи, оло нош, огдыре кык лудкечез куто шуыса: лыдӟо но, берыкто но - но, одӥг мар ке кузьда веранзэ берыктэмъяськыса, нош ик со интые ик когӟай - мынам музаелэн, пичи мурт кадь нискетыса, кытчы ке миндэр улэ пегӟемез потыны кутскиз. Соин ик, умойгес луоз, дыр, ӧжыт туннэ нунал сярысь верало ке.
Кык, тунсыко луэменыз воксё шумпоттытӥсь пара бере, мон Калман Миксатлэсь книгазэ кутыса, огъяулоннимылэн тубатэтӥз бызьыса васьки но, татын ик, Геллерт гурезьмылэн йырпыдэсказ интыяськем парке дыртӥ. Шунды но пуксён пала питыра ини - кематэк ӧвӧл тапаллы ваче син сылӥсь кык ӝужыт, тулыс вуэмъя вожектэм из вырйылъёс куспы ватӥськоз. Соин ик, дыртоно!
Тани сюбег ветлон сюрестӥ со парке кожисько. Мусо парк, тон вал одӥгез соос пӧлысь, марлэсь мон мӧзми та паймымон карлэсь кыдёкын улыкум. Уго соку, кык ар талэсь азьло, ӵемысь зарядка лэсьтыны поталляй дорад. Али нош мон воштӥськемын, табере тон монэ ӵемгес штанэн но кроссовкиен уд, дэремен адӟиськод. Туннэ но мон пидэсозям яркыт сяськаё вожалэс дэременым, пурысь плащен. Тон нокыӵе но кенерэн котыртэмын ӧвӧл, огшоры сямен кутскиськод но - тӥни: нырысь вож гуждорен, оген-оген сылӥсь писпуосын; трос пӧртэм сюбег сюресъёс нуо тынад шорсюлмад. Пушкад пырыса, соку ик шӧдоно каньыллыктэ. Инмаре, кыӵе мон шумпотӥсько, нош ик татын шуыса! Кыӵе шумпотӥсько!
Татын ик сьӧдюберъёс, чик номырлэсь но курдатэк, воксё мыным матын музъем вылтӥ тэтчало, серем вырыса ӵуж ныро йырзэс бергато, ӵуштыр-ӵаштыр карыса нымы-кибыосты утчало. Нош кыӵе шулдыр чирдо соос! Эх, жаль, мон Виталий Валентинович Бианки сямен уг быгатӥськы со куараоссылэсь чеберлыксэс возьматыны! Сьӧдюберъёсты сяна, эшшо мукет пичи пурысь тылобурдоосты - таосызлэсь кин луэмзэс уг тодӥськы, йырме ӝутыса - ӝужыт-ӝужыт писпулэн вайёсыз вылысьтыз векчи потэм вож куаръёс пӧлысь синйылтыны удалтӥз мыным. Задор тирргетыса кисьтӥськись кырӟанзы воксё туна, йырез берыктэ, нош сюлэм ганяк луыса кылзэ та бакельлыко инмысь васькись куараез.
Нош тани нылпиослы тупатэм лейкан. Нылпиослы? Мар вераськисько мон... Иське, мон но татчыозь нылпи на? Тани пукси но, книгаме артэ лэчыранэ выдтӥ, но нырысь каллен, собере нош но нош донгиськыса, ууух! отчы-татчы, отчы-татчы - ӟечыраса лобӟи ук, золгес но золгес, вылӥе-вылӥе! Нош йырвадьсын лыз инбам, писпуослэн вож куаръёсын пуштырскем лап-лап вӧлдӥськем вайёссы - ваньмыз со ӝоглыклэсь син азьын ворекъя, шудэ - кыӵе шулдыр! Но таӵе шудо минутъёс бере капчияк йырбергам шӧдскытӥз, тырмоз ини шуыса. Соин ик мон книгаме басьтыса каллен веттаськыса лыдӟиськонэ ... выйи шуи ке, алдаськогес ик дыр, уго 19-тӥ даурын аспӧртэмлыко стилен гожтэм вакчи мадьяр роман мыным туж капчиен уг сётӥськы на ай. Тодмотэм кылъёсын нюръяськыса пуки, шуыны луоз, тодмоосызлэн юрттэменызы пуштросызэсь ческытсэ юыса.
Ну и вот! А собере лыктӥз семья пичи пиенызы, кудӥз, ӧжыт лейкам бераз, кошкыкуз мыным кема учкись небыт мусо мынян кузьмаз. Мар эшшо шумпотон понна кулэ на!
Умой шутэтски туннэ.
Будапешт.
Кык, тунсыко луэменыз воксё шумпоттытӥсь пара бере, мон Калман Миксатлэсь книгазэ кутыса, огъяулоннимылэн тубатэтӥз бызьыса васьки но, татын ик, Геллерт гурезьмылэн йырпыдэсказ интыяськем парке дыртӥ. Шунды но пуксён пала питыра ини - кематэк ӧвӧл тапаллы ваче син сылӥсь кык ӝужыт, тулыс вуэмъя вожектэм из вырйылъёс куспы ватӥськоз. Соин ик, дыртоно!
Тани сюбег ветлон сюрестӥ со парке кожисько. Мусо парк, тон вал одӥгез соос пӧлысь, марлэсь мон мӧзми та паймымон карлэсь кыдёкын улыкум. Уго соку, кык ар талэсь азьло, ӵемысь зарядка лэсьтыны поталляй дорад. Али нош мон воштӥськемын, табере тон монэ ӵемгес штанэн но кроссовкиен уд, дэремен адӟиськод. Туннэ но мон пидэсозям яркыт сяськаё вожалэс дэременым, пурысь плащен. Тон нокыӵе но кенерэн котыртэмын ӧвӧл, огшоры сямен кутскиськод но - тӥни: нырысь вож гуждорен, оген-оген сылӥсь писпуосын; трос пӧртэм сюбег сюресъёс нуо тынад шорсюлмад. Пушкад пырыса, соку ик шӧдоно каньыллыктэ. Инмаре, кыӵе мон шумпотӥсько, нош ик татын шуыса! Кыӵе шумпотӥсько!
Татын ик сьӧдюберъёс, чик номырлэсь но курдатэк, воксё мыным матын музъем вылтӥ тэтчало, серем вырыса ӵуж ныро йырзэс бергато, ӵуштыр-ӵаштыр карыса нымы-кибыосты утчало. Нош кыӵе шулдыр чирдо соос! Эх, жаль, мон Виталий Валентинович Бианки сямен уг быгатӥськы со куараоссылэсь чеберлыксэс возьматыны! Сьӧдюберъёсты сяна, эшшо мукет пичи пурысь тылобурдоосты - таосызлэсь кин луэмзэс уг тодӥськы, йырме ӝутыса - ӝужыт-ӝужыт писпулэн вайёсыз вылысьтыз векчи потэм вож куаръёс пӧлысь синйылтыны удалтӥз мыным. Задор тирргетыса кисьтӥськись кырӟанзы воксё туна, йырез берыктэ, нош сюлэм ганяк луыса кылзэ та бакельлыко инмысь васькись куараез.
Нош тани нылпиослы тупатэм лейкан. Нылпиослы? Мар вераськисько мон... Иське, мон но татчыозь нылпи на? Тани пукси но, книгаме артэ лэчыранэ выдтӥ, но нырысь каллен, собере нош но нош донгиськыса, ууух! отчы-татчы, отчы-татчы - ӟечыраса лобӟи ук, золгес но золгес, вылӥе-вылӥе! Нош йырвадьсын лыз инбам, писпуослэн вож куаръёсын пуштырскем лап-лап вӧлдӥськем вайёссы - ваньмыз со ӝоглыклэсь син азьын ворекъя, шудэ - кыӵе шулдыр! Но таӵе шудо минутъёс бере капчияк йырбергам шӧдскытӥз, тырмоз ини шуыса. Соин ик мон книгаме басьтыса каллен веттаськыса лыдӟиськонэ ... выйи шуи ке, алдаськогес ик дыр, уго 19-тӥ даурын аспӧртэмлыко стилен гожтэм вакчи мадьяр роман мыным туж капчиен уг сётӥськы на ай. Тодмотэм кылъёсын нюръяськыса пуки, шуыны луоз, тодмоосызлэн юрттэменызы пуштросызэсь ческытсэ юыса.
Ну и вот! А собере лыктӥз семья пичи пиенызы, кудӥз, ӧжыт лейкам бераз, кошкыкуз мыным кема учкись небыт мусо мынян кузьмаз. Мар эшшо шумпотон понна кулэ на!
Умой шутэтски туннэ.
Будапешт.
