Куддыр кылӥськод кыӵе ке кырӟанэз, нош собере сое вунэтэм уг луы. Мадьяръёс сыӵеосты"fülbemászó dallam" шуо, кылысь кылэ берыктыса - "пелепырись крезьгур". И ветлӥськод собере ас поннад сое нёжъяса. Нош вал-а тӥляд куке но озьы, куке тӥ сое кылӥды, но, коть мар кар, кырӟаны сое уд быгатӥське. Кыӵе кырӟаны, йырады мелодиез но кылемын ӧвӧл! А вунэтэмды озьы ке но уг луы. Малы ке шуоно, сюлмады пыриз. Пыриз но быдэстэс ненег яратон зарезен ӟыгыртӥз кадь, и табере уг лэзьы; но тон шӧдӥськод, тон табере сотэк улыны уд быгаты ини шуыса. Синмаськид но шуыны уг луы - со тонэ аслыз синмаськытӥз, тынэсьтыд юаськытэк. Сыӵе дыръя шуо - безмятежное счастье.  И ветлӥськод тон, огвакытэ сыӵе шудо но сыӵе шудтэм. Малы ке шуоно, сотэк табере улэмед уг луы. Малы ке шуоно со кисьтӥськиз кытысь ке йылӥысь, но кӧня ке минут ортчыса ышиз... Ышиз! Ньыль минутъем роман.
Малпаськоды, мон сое инмысь кылӥ-а? Аа, как бы не так. Улонлэн прозаез аслэсьтыд диктовать каре. Вациын кеж-муж ветлӥсь туристъёс пӧлтӥ дыртытэк лёгаськисько вал, шуныт куазьлэсь но пыд котыртӥм выжозь юбкаелэн лэйкамезлэсь эзыласа. Тани "Orsay", татын куддыръя туж но туж мусо дэремъёс луыло. Пыри. Но собере мар вал, тӥ тодӥськоды ини.
Киултӥз со монэ. Нош мон? Нош мон, вань йӧнъяськонме ыштыса, сьӧраз мынӥ. Сое утчаны. Вузаськись-нылаш доры матэктыса, вераськонме мытӥ.
 - Иген! - шуэ со мыным но мыня, юрттыны дась луэмзэ возьматыса.
 - Ээ, мон али... дӥськут сярысь уг... - со понна пока валантэм кылъёсты могасько.
 Паймиз, но кылзэ дальше.
 - Ӧд быгатысалыд-а вераны, кин али тае кырӟаз? (Фууу...)
 - ?!... Ой, жаляса верано, уг, ми соин ум выриське, соин уг тодӥськы.
 Аслам ик сереме потӥз.
 - Тау! - потон пала вамыштӥ.
 - Вождэ эн вайы...
Кыӵе умой нылаш! "Empatikus" - шуо сыӵе дыръя венгеръёс. Мар понна вожме поттом? Мукетыз со интыын монэ нырзэ чатыръяса йырысен-пыдозям учкысалыз ини.
Соин ик, ӧз удалты ке но, мылкыд умой.
Берло ини, доре бертыса но, мон ӧй быгаты буйгатскыны. Мӧзмисько но тӥни. Сотэк номыр но кулэ ӧвӧл. Лулы-сюлмы, кызьы мон табере тонэ шедьтом?

Озьы ке но, мон ӧй дугды оскемысь. Кыӵе ке аслэсьтыз карись ваменъяськонэн куинь-а мар-а час пуки вотэсын бугыръяськыса. Мелодизэ тодам вайыны быгатытэк, француз кылэз уг тодӥськы бере (эх-ма!), одӥг кылзэ но тодытэк. Малпай, со кыӵе ке туэ хит. Утчай "Французский хит-2014". Оо пе. Одӥг разочарование.

Нош собере вуёмем берам воже потыса огшоры кылъёс гожтӥ гуглэ: "девушка и парень песня на французском". Тани кыӵе ке ссылка... Так. Кыӵе ке мон кадь ик шудтэм бадӟым букваосын гожтэм: " Ищу песню на французском. Поют парень и девушка: куплет сначала парень, потом девушка. Очень мелодичная и нежная. Припев чуть протяжный. У девушки голос тоненький. Помогите, пожалуйста."

О. Оо. Омырез мур кыски. Только дырылэсь вазь эн шумпоты! 

Кык ответ всего. Кыкетӥез:

- Может быть, Marc Lavoine & Valérie Lemercier - La Grande Amour. 

И ссылка сётэм видео вылэ. Зиби. Лэзиськиз. Кутскиз шудыны. Курадӟытӥсь возьман минутъёс. И... и - со! Со! СО!!! Тау, Инмаре! Ааааааааа!  - Комнатысь нылъёс мон шоры, кызьыгес ай сое огшоры кылын вералод - паймыса учко, в общем.

Шӧдонэ монэ ӧз алда - зэмос чебер крезьгур, куараос, но зэмос чебер кылъёс. Конечно, яратон сярысь.

Будапешт.